ಕೇಂದ್ರ ಸರ್ಕಾರದ ಪಿಂಚಣಿ ನಿಯಮಗಳಲ್ಲಿ ಬದಲಾವಣೆ ಮಾಡುವ ಕುರಿತು ಮಹತ್ವದ ಚರ್ಚೆ

ಇದೀಗ ಕೇಂದ್ರ ಸರ್ಕಾರದ ಪಿಂಚಣಿ ನಿಯಮಗಳಲ್ಲಿ ಬದಲಾವಣೆ ಮಾಡುವ ಕುರಿತು ಮಹತ್ವದ ಚರ್ಚೆ ನಡೆಯುತ್ತಿದೆ. 8ನೇ ವೇತನ ಆಯೋಗದ ಶಿಫಾರಸುಗಳನ್ನು ತಯಾರಿಸುವ ಹಂತದಲ್ಲೇ, ಪಿಂಚಣಿಯ ಕಮ್ಯೂಟೆಡ್ ಭಾಗ (Commuted Pension) ಮರುಪಡೆಯುವ ಅವಧಿಯನ್ನು 15 ವರ್ಷಗಳಿಂದ 12 ವರ್ಷಗಳಿಗೆ ಇಳಿಸುವ ಕುರಿತು ಚರ್ಚೆ ಮತ್ತೆ ಮುನ್ನೆಲೆಗೆ ಬಂದಿದೆ.

ಪ್ರಸ್ತುತ ನಿಯಮಗಳ ಪ್ರಕಾರ, ನಿವೃತ್ತಿಯ ಸಮಯದಲ್ಲಿ ಕೇಂದ್ರ ಸರ್ಕಾರಿ ನೌಕರರು ತಮ್ಮ ಪಿಂಚಣಿಯ 40% ವರೆಗೆ ಒಂದೇ ಬಾರಿಗೆ (lump sum) ಪಡೆಯಬಹುದು. ಆದರೆ ಅದರ ಪ್ರತಿಯಾಗಿ, ಆ ಶೇಕಡಾವಾರು ಪ್ರಮಾಣದಲ್ಲಿ ಅವರ ಮಾಸಿಕ ಪಿಂಚಣಿ ಕಡಿತಗೊಳ್ಳುತ್ತದೆ. ಈಗಿನ ನಿಯಮ ಪ್ರಕಾರ, 15 ವರ್ಷಗಳ ನಂತರವೇ ನೌಕರರು ಸಂಪೂರ್ಣ ಪಿಂಚಣಿ ಪಡೆಯಲು ಅರ್ಹರಾಗುತ್ತಾರೆ. ಈ 15 ವರ್ಷದ ಅವಧಿಯೇ ಪಿಂಚಣಿದಾರರ ದೀರ್ಘಕಾಲದ ಬೇಡಿಕೆಯಾಗಿ ಪರಿಣಮಿಸಿದೆ.

ಹಿಂದಿನ 5ನೇ ವೇತನ ಆಯೋಗವು ಪಿಂಚಣಿ ಪ್ರಮಾಣವನ್ನು ಹೆಚ್ಚಿಸಿದರೂ, ಕಮ್ಯೂಟೆಡ್ ಪಿಂಚಣಿ ಅವಧಿಯನ್ನು 12 ವರ್ಷಗಳಿಗೆ ಇಳಿಸುವ ಶಿಫಾರಸು ಆಗಿದ್ದರೂ ಆ ಸಮಯದಲ್ಲಿ ಜಾರಿಗೆ ಬಂದಿರಲಿಲ್ಲ. ಈಗ 8ನೇ ವೇತನ ಆಯೋಗದಲ್ಲಿ ಅದೇ ಬೇಡಿಕೆ ಮತ್ತೆ ಬಲವಾಗಿ ಕೇಳಿಬರುತ್ತಿದೆ. NC-JCM (ರಾಷ್ಟ್ರೀಯ ಜಂಟಿ ಸಮಾಲೋಚನಾ ಮಂಡಳಿ) ಹಾಗೂ ನೌಕರರ ಸಂಘಟನೆಗಳು, “ಜೀವನಾವಧಿ ಹೆಚ್ಚಾಗಿರುವುದರಿಂದ 15 ವರ್ಷ ಕಾಯುವ ಅವಶ್ಯಕತೆ ಇಲ್ಲ, 12 ವರ್ಷಗಳೊಳಗೆ ಪೂರ್ಣ ಪಿಂಚಣಿ ನೀಡಬೇಕು” ಎಂದು ಆಗ್ರಹಿಸುತ್ತಿವೆ.

ಇದರ ಜಾರಿಗೆ ಬಂದರೆ, ನಿವೃತ್ತಿಯ ನಂತರದ ಮೂರೇ ವರ್ಷಗಳ ಮುಂಚಿತವಾಗಿ ಪಿಂಚಣಿದಾರರಿಗೆ ಸಂಪೂರ್ಣ ಪಿಂಚಣಿ ಸಿಗಲಿದೆ. ಇದು ಲಕ್ಷಾಂತರ ಪಿಂಚಣಿದಾರರಿಗೆ ದೊಡ್ಡ ಅನುಕೂಲವಾಗಲಿದೆ. ಏಕೆಂದರೆ ಹೆಚ್ಚಿನ ವಯಸ್ಸಿನಲ್ಲಿ ಪಿಂಚಣಿ ಸಂಪೂರ್ಣ ಸಿಗುವವರೆಗೂ ಕಾಯುವ ಬದಲು, ಬೇಗನೆ ಸಿಗುವ ಮೂಲಕ ಜೀವನೋಪಾಯ ಸುಲಭಗೊಳ್ಳುತ್ತದೆ.

ಆದರೆ ಸರ್ಕಾರದ ವಾದ ಪ್ರಕಾರ, ಈ ನಿಯಮವನ್ನು 15 ವರ್ಷಗಳ ಕಾಲವೇ ಉಳಿಸಿಕೊಂಡಿರುವುದಕ್ಕೆ ತಜ್ಞರ ಸಲಹೆ ಮತ್ತು ಹಣಕಾಸಿನ ಅಪಾಯದ ಅಂಶಗಳನ್ನು ಕಾರಣವಾಗಿ ನೀಡಲಾಗಿದೆ. ಹಿಂದಿನ ಎರಡು ವೇತನ ಆಯೋಗಗಳೂ ಈ ಅವಧಿಯನ್ನು ಬದಲಾಯಿಸಲು ಯೋಗ್ಯತೆ ಕಂಡುಕೊಂಡಿರಲಿಲ್ಲ. ಆದ್ದರಿಂದ ಈ ಬಾರಿ 8ನೇ ವೇತನ ಆಯೋಗವೇ ಮುಖ್ಯ ನಿರ್ಣಯ ಮಾಡುವ ಸಾಧ್ಯತೆ ಇದೆ.

ಒಟ್ಟಿನಲ್ಲಿ, ಈ ಬದಲಾವಣೆಯ ಜಾರಿಗೆ ಬಂದರೆ ಪಿಂಚಣಿದಾರರಿಗೆ ಆರ್ಥಿಕ ಭದ್ರತೆಯೊಂದಿಗೆ ಹೆಚ್ಚು ಆತ್ಮಸ್ಥೈರ್ಯ ಸಿಗಲಿದೆ. ನಿವೃತ್ತಿ ನಂತರದ ಹಂತದಲ್ಲಿ ತಕ್ಷಣ ಹಣದ ಅಗತ್ಯತೆ ಇರುವ ಸಂದರ್ಭದಲ್ಲಿ 12 ವರ್ಷಗಳ ಒಳಗೆ ಪೂರ್ಣ ಪಿಂಚಣಿ ದೊರೆಯುವುದು ದೊಡ್ಡ ತೃಪ್ತಿಯ ವಿಷಯ. ಸರ್ಕಾರ ಶೀಘ್ರದಲ್ಲೇ ಅಂತಿಮ ನಿರ್ಧಾರ ಕೈಗೊಂಡು ಅಧಿಕೃತ ಪ್ರಕಟಣೆ ಹೊರಡಿಸುವ ನಿರೀಕ್ಷೆಯಿದೆ.

 15 ವರ್ಷಗಳ ನಿಯಮವನ್ನು 12 ವರ್ಷಗಳಿಗೆ ಇಳಿಸುವ ಬದಲಾವಣೆ ಜಾರಿಯಾದರೆ, ಇದು ದೇಶದ ಲಕ್ಷಾಂತರ ಪಿಂಚಣಿದಾರರಿಗೆ ಬದುಕು ಸುಲಭಗೊಳಿಸುವ ಮಹತ್ವದ ಹೆಜ್ಜೆಯಾಗಲಿದೆ.